غزوہ بحران

ہجرت کے تیسرے سال، ربیع الثانی کے مہینے میں حضرت محمد مصطفیٰ غزوہ بَحران کے لئے مدینہ منورہ سے اپنے لشکر کے ساتھ روانہ ہوئے۔¹ اس غزوہ کو غزوہ بَحران کے ساتھ ساتھ غزوہ فُرع²اور غزوہ بنو سلیم بھی کہا گیا ہے۔ ³ اس واقعہ کو غزوہ بَحران اس لیے کہا جاتا ہے کیونکہ یہ حجاز کی حدود میں مدینہ طیبہ سے کچھ فاصلے پر موجود ”بَحران “ کے مقام پر لڑا گیا۔ اس غزوہ میں مسلمانوں کی کفّار کے ساتھ باقاعدہ جنگ نہیں ہوئی ⁴ کیونکہ لشکر اسلام جب بَحران پہنچا تو بنو سلیم کے لوگ لشکر اسلام کی آمد کا سن کروہاں سے بھاگ نکلے تھے۔ ⁵

پسِ منظر و سبب

غزوه بحران كا سبب یہ تھا کہ آپ کو 3ہجری میں اطلاع ملی کہ بنو سلیم کے افراد فُرع کے قریب مقامِ بَحران پر مسلمانوں کے خلاف حملہ کرنے کے لیے جمع ہو رہے ہیں ۔ ⁶ آپ نے جب اس خبر کو سنا تو ہجرت کے تیسرے سال، ربیع الثانی کے مہینے میں مدینہ منورہ سے اپنے لشکر کے ساتھ جنگ کی نیت سے روانہ ہوئےتاکہ دشمن کا بھرپور مقابلہ کیا جا سکے۔ ⁷

مسلمان لشکر کی تعداد اور روانگی

آپ اپنے 300 صحابہ کرام کے ہمراہ مدینہ منوّرہ سے نکل کر انتہائی تیز رفتاری کے ساتھ کسی کو کچھ بتائے بغیر بَحران کی طرف روانہ ہو گئے۔اس موقع پرآپ نے مدینہ منوّرہ میں حضرت عبداللہ بن مکتوم کو اپنا نائب مقرر فرمایا۔ ⁸لشکر اسلام جب بَحران پہنچا تو بنو سلیم مسلمانوں کے لشکر کا سن کر خوف کی وجہ سے وہاں سے بھاگ نکلے۔ ⁹آپ نے وہاں چند دن قیام فرمایا ¹⁰ اور پھر جمادی الاوّل کے مہینے میں وہاں سے واپس مدینہ منورہ تشریف لے آئے۔ ¹¹

• ¹  الشیخ صفی الرحمن المبارکفوری، الرحیق المختوم، مطبوعۃ: دار ابن حزم للطباعۃ والنشر والتوزیع، بیروت، لبنان، 2010م، ص: 262
• ²  أبو محمد عبد الملک بن ھشام المعافري، السیرۃ النبویۃ لابن ھشام، ج-2، مطبوعۃ: مكتبة ومطبعة مصطفى البابي الحلبي، القاھرۃ، مصر، 1955م، ص: 46
• ³  أبو ا لعباس أحمد بن محمد القسطلانی، المواھب اللدنیۃ بالمنح المحمدیۃ، ج-1، مطبوعۃ: المكتبة التوفيقية، القاهرة، مصر، د۔ ت۔ ط، ص: 239
• ⁴  ابو عبیدہ عبد اللہ بن عبد العزیز البکری، معجم ما استعجم من اسمام البلاد والمواضع، ج-1، عالم الکتب، بیروت، لبنان، 1403ھ، ص: 228
• ⁵  ابو الفرج علی بن ابراہیم الحلبی، انسان العیون فی سیرۃ الامین المامون، ج-2، مطبوعۃ: دار الکتب العلمیۃ، بیروت، لبنان، 2013م، ص: 291
• ⁶  ابو عبداللہ محمد بن عمرالواقدی، المغازی، ج-1، مطبوعۃ: دارالکتب العلمیۃ، بیروت، لبنان، 2004م، ص:182
• ⁷  الشیخ صفی الرحمن المبارکفوری، الرحیق المختوم، مطبوعۃ: دار ابن حزم للطباعۃ والنشر والتوزیع، بیروت، لبنان، 2010م، ص: 262
• ⁸  ابو محمد عبد الملک بن ہشام المعافری، السیرۃ النبویۃ لابن ہشام، ج-2، مطبوعۃ: شرکۃ مکتبۃ ومطبعۃ مصطفی البابی الحلبی، القاہرۃ، مصر، 1955م، ص: 46
• ⁹  ابو الفرج علی بن ابراہیم الحلبی، انسان العیون فی سیرۃ الامین المامون، ج-2، مطبوعۃ: دار الکتب العلمیۃ، بیروت، لبنان، 2013م، ص: 291
• ¹⁰  ابو عبداللہ محمد بن عمرالواقدی، المغازی، ج-1، مطبوعۃ: دارالکتب العلمیۃ، بیروت، لبنان، 2004م، ص: 182
• ¹¹  الشیخ صفی الرحمن المبارکفوری، الرحیق المختوم، مطبوعۃ: دار ابن حزم للطباعۃ والنشر والتوزیع، بیروت، لبنان، 2010م، ص: 262